నేనును నా యింటివారును

   నేనును నా యింటివారును - నీతి సూర్యుని గొలుతుము
    దీనమనసును గలిగి దేవుని - దివ్యసేవను జేతుము

1. అనుదినంబును ప్రభుని దలచుచు - అలయకను ప్రార్ధింతుము
    అనవరత మాప్రభుని చిత్తము - ననుకరింతుము పనులలో ||నేను||

2. వేదవాక్య పఠనమందు - విసుగు జెందకనుందుము
    ఆదరంబున దైవచిత్తము ననుసరించుచు నడుతుము ||నేను||

3. ఆశతోడను ప్రభుని దినమును - నాచరింతుము మరువక
    విసుకు జెందకనాలయమునకు - పిన్న పెద్దల దెత్తుము ||నేను॥

4. సంఘ కార్యక్రమములందు - సహకరింతుము ప్రీతితో
    భంగపరచెడి పనులనన్నిటి కృంగ దీసెదమనిశము ||నేను||

5. ప్రేమతోడను పొరుగువారిని - ప్రియులుగను భావింతుము
    క్షమయు స్నేహమునే నేర్చి ప్రభుకడ-శాంతితో జీవింతుము ||నేను||

6. శక్తికొలది శరీరబలమును - శ్రమను క్రీస్తుకు నిత్తుము
    భక్తితో హృదయమును పూర్తిగ ప్రభునికే యర్పింతుము ||నేను||

7. చిన్నవారలు దైవరాజ్యపు - చిరుత వారసులంచును
    అన్నివేళల వారి వృద్ధికి - మిన్నగ దోడ్పడెదము ||నేను||

8. పెద్దవారలు దైవజనులని - పేర్మితో భావింతుము
    శుద్ధుడగు ప్రభు క్రీస్తు మనసును - శ్రద్ధతోడను జూపుచు ||నేను॥

9. జీవితంబున ప్రభుని ప్రేమా - శ్శీసులను ప్రచురింతుము
    దివ్యజ్యోతుల రీతి వెలుగుచు - దివ్యసన్నిధి నుందుము ||నేను||