నడిపించు నా నావ

  నడిపించు నా నావ - నడిసంద్రమున దేవా
  నవజీవన మార్గమున - నా జన్మ తరియింప

1. నా జీవిత తీరమున - - నా యపజయ భారమున
  నలిగిన నా హృదయమును - నడిపించుము లోతునకు
  నా యాత్మ విరబూయ - నా దీక్ష ఫలియింప
  నా నావలో కాలిడుము - నా సేవ జేకొనుము

2. రాత్రంతయు శ్రమపడినా - రాలేదు ప్రభూ జయము
  రహదారులు వెదకినను - రాదాయెను ప్రతిఫలము
  రక్షించు నీ సిలువ - రమణీయ లోతులలో
  రతనాలను వెదకుటలో - రాజిల్లు నా పడవ

3. ఆత్మార్పణ జేయకయే - ఆశించితి నీ చెలిమి
    అహమును ప్రేమించుచునే - అరసితి ప్రభు నీ కలిమి
  ఆశ నిరాశయె - ఆవేద నెదురాయె
  ఆధ్యాత్మిక లేమిగని - అల్లాడె నా వలలు

4. ప్రభు మార్గము విడచితిని - ప్రార్థించుట మానితిని
  ప్రభు వాక్యము వదలితిని - పరమార్ధము మరచితిని
  ప్రపంచ నటనలలో - ప్రావీణ్యమును బొంది
  ఫలహీనుడనై యిపుడు - పాటింతు నీ మాట

5. లోతైన జలములలో - లోతున వినబడు స్వరమా
  లోబడుటను నేర్పించి - లోపంబులు సవరించి
  లోనున్న - యీవులలో లోటైన నా బ్రతుకు
  లోపించని యర్పణగా - లోకేశ జేయుమయ

6. ప్రభు యేసుని శిష్యుడనై ప్రభు ప్రేమలో పాదుకొని
  ప్రకటింతును లోకములో - పరిశుద్ధుని ప్రేమకథ
  పరమాత్మ ప్రోక్షణతో - పరిపూర్ణ సమర్పణతో
  ప్రాణంబును ప్రభుకొరకు - పానార్పణము జేతు