అపరాధిని యేసయ్య - కృపజూపి బ్రోవుమయ్యా

అపరాధిని యేసయ్య - కృపజూపి బ్రోవుమయ్యా

నెపమెంచకయె నీ కృపలో - నపరాధములను క్షమించు

1. సిలువకు నిను నే గొట్టితిని - తులువలతో జేరితిని 

కలుషంబులను మోపితిని దోషుండ నేను ప్రభువా  llఅపll

2. ప్రక్కలో బల్లెపుపోటు - గ్రక్కున పొడిచితి నేనే 

మిక్కిలి బాధించితిని - మక్కువ జూపితివయ్యో      llఅపll

3. ముళ్ళతో కిరీటంబు - నల్లి నీ శిరమున నిడితి 

నావల్ల నేరమాయె - చల్లని దయగల తండ్రి          llఅపll

4. దాహంబు గొనగా చేదు చిరకను ద్రావనిడితి 

ద్రోహుండనై జేసితిని - దేహంబు గాయంబులను    llఅపll

5. ఘోరంబుగా దూరితిని నేరంబులను జేసితిని 

క్రూరుండనై గొట్టితిని - ఘోరంపు పాపిని దేవా       llఅపll

6. చిందితి రక్తము నాకై - పొందిన దెబ్బలచేత 

నిందలు పెట్టితినయ్యో - సందేహమేలనయ్యా        llఅపll

7. శిక్షకు పాత్రుడనయ్యా - రక్షణ దెచ్చితివయ్యా 

అక్షయభాగ్యమునియ్య - మోక్షంబు జూపితివయ్యా    llఅపll